మోదీ మ‌ధ్య‌త‌ర‌గ‌తి కుటుంబీకుడే

ఒక చాయ్‌వాలా ప్ర‌ధాని అయిన దేశం మ‌న‌ది. అతి పెద్ద ప్ర‌జాస్వామ్య వ్య‌వ‌స్థకి ఇంత‌కంటే నిద‌ర్శ‌నం ఉండ‌దు. కుల‌మ‌త జాతివిభేదాలు లేకుండా 120 కోట్ల మంది ప్ర‌జ‌లు జీవిస్తున్న దేశం.. ప్ర‌ధాని అంటే.. సూటూ, బూటూ, కార్లు, బంగ‌ళాలు, నాలుగు బ్యాంకు అకౌంట్లు.. రాజ‌భోగాలు అన్నీ ఉంటాయి. అయితే ఇప్పుడు ప్ర‌ధాని మోడీ ఆస్తుల విలువ ఎంత‌? ఆయ‌నకు ఎన్ని బ్యాంకు అకౌంట్లు ఉన్నాయి? ఆయ‌న స్థిర,చ‌రాస్తుల విలువ ఎంత‌? అనే సందేహం ఎప్పుడో ఒకప్పుడు రాక‌పోదు. ఆయ‌న ఆస్తుల విలువ ఎంతో తెలుసా.. రూ.1.41కోట్లు. ఏంటి న‌మ్మ‌శ‌క్యంగా లేదా! ప్ర‌స్తుతం ఆయ‌న చేతిలో ఉన్న న‌గ‌దు ఎంతో తెలుసా.. రూ.4,700. మోదీ 13 ఏళ్ల క్రితం కొన్న ఇంటి విలువ 25 రెట్లు పెరగడంతో ఆస్తుల విలువ పెరిగింది. గత ఆర్థిక సంవత్సరం చివరి వరకున్న మోడీ ఆస్తుల వివరాలను ప్రధానమంత్రి కార్యాలయం (పీఎంఓ) తాజాగా ప్రకటించింది.

పీఎంఓ వివరాల ప్రకారం.. 2014, మే 26న ప్రధానిగా బాధ్యతలు చేపట్టిన మోడీ పేరున ఎలాంటి వాహనం లేదు. ఆయన ఇప్పటికీ తన బ్యాంకు ఖాతాను గుజరాత్‌లోనే కొనసాగిస్తున్నారు. ఆయనకు ఎలాంటి రుణాలూ లేవు. మోడీ వద్ద దాదాపు 45 గ్రాముల బరువైన నాలుగు బంగారు ఉంగరాలున్నాయి. 2015, మార్చి 31 నాటికి వాటి విలువ రూ.1.19 లక్షలు. 2016 జనవరి 30 వరకు వివరాలను పీఎంఓ వెబ్‌సైట్‌లో పొందుపరిచారు. ఇక పెట్టుబడుల విషయానికొస్తే, రూ.20 వేల విలువైన ఎల్‌అండ్‌టీ బాండ్లు (ట్యాక్స్ సేవింగ్స్), రూ.5.45 లక్షల విలువైన నేషనల్ సేవింగ్స్ సర్టిఫికెట్స్, రూ.1.99 లక్షల విలువైన జీవిత బీమా పాలసీలున్నాయి.

మోడీ చరాస్తుల మొత్తం విలువ రూ.41.15 లక్షలు. స్థిరాస్తి విషయానికొస్తే, గాంధీనగర్‌లోని ఒక ఇంట్లో నాలుగోవంతు వాటా ఉంది. 3,531.45 చదరపు అడుగుల ఈ వాటాలో 169.81 చదరపు అడుగుల బిల్టప్ ఏరియా ఉంది. దీన్ని 2002 అక్టోబర్ 25న రూ.1,30,488తో కొనుగోలు చేశారని పీఎంఓ తెలిపింది. దీనిపై పెట్టుబడుల రూపంలో చేసిన నిర్మాణానికి రూ.2,47,208 అయిందని పేర్కొంది. దీని ప్రస్తుత మార్కెట్ విలువ దాదాపు రూ. కోటి ఉందట‌. బ్యాంకు డిపాజిట్లకొస్తే, ఎస్‌బీఐలో రూ.94,903, రాజ్‌కోట్ నాగ్‌రిక్ సహకారి కోఆపరేటివ్ బ్యాంకులో రూ.30,347 డిపాజిట్లు ఉన్నాయి. దీంతోపాటు ఎస్‌బీఐలో రూ.30,72,017 విలువైన ఎఫ్‌డీలున్నాయి. ఆయన భార్య జశోదాబెన్ ఆస్తుల వివరాలు తెలియవని వెల్లడించారు.